Në konferencën në prag të ndeshjes ndaj Salzburgut, të vlefshme për Europa Leaguen, trajneri i Napolit, Ancelotti kishte zgjedhur për ta shoqëruar, Elseid Hysajn. Prej javësh flitet që mes të dyve nuk ka raporte të mira, pasi mbrojtësi shqiptar shpeshherë është ulur në stol.
Mbrojtësi shkodran bëri thirrje për përqendrim maksimal, duke kujtuar se asgjë nuk ka mbaruar, pavarësisht se napolitanët arritën të triumfojnë me rezultatin 3-0 në sfidën e parë.
“Luajmë në një stadium të nxehtë dhe përballë një kundërshtari që ka shumë cilësi, pavarësisht se fituam ne 3-0 në ndeshjen e parë. Duhet të tregohemi të qetë dhe të përqendruar maksimalisht, për të kontrolluar lojën nga fillimi në fund. E dimë që do të jetë e vështirë, por do të përballemi pa frikë, për të mbrojtur rezultatin e ndeshjes së parë”, tha mbrojtësi shkodran.
Me uljen në stol të Ancelottit, Hysaj është lënë shpesh në stol nga Ancelotti, ndërsa në jo pak raste është aktivizuar edhe si mbrojtës i majtë. Megjithatë shkodrani pranon qetësisht zgjedhjet e trajnerit dhe shprehet se mund të luajë kudo, ndërsa tregon se mezi pret golin e tij të parë.
“Jemi 23 lojtarë në skuadër dhe të gjithë synojmë të luajmë, por unë jam gati të sakrifikoj dhe të luaj ku të dojë trajneri. Prej kohësh pres golin tim të parë me Napolin dhe angazhohem shumë për ta bërë këtë, por nuk ia kam dalë. Megjithatë jam i qetë dhe natyrisht që do të gëzohesha shumë kur të vinte”, tha Elseid Hysaj.
