Hungaria deri më tani ka regjistruar 4.234 persona të infektuar me COVID-19 dhe 595 viktima. Për shkak të situatës së rëndë nga pandemia, Hungaria ka vendosur masa të reja kufizuese. Këtu përfshirë ndalimin e hyrjes për të huajt nga disa shtete si Kosovën, Shqipërinë dhe Malin e Zi, të cilat i ka futur në listën e kuqe me rrezikshmëri të lartë nga përhapja e virusit.
Nga dita e mërkurë, hungarezët që kthehen nga vendet e listës së verdhë dhe listës së kuqe, do të jenë të detyruar të bëjnë kontrolle dhe të qëndrojnë në karantinë për dy javë, edhe nëse nuk janë të infektuar.
I vetmi përjashtim do të bëhet për ata që dalin dy herë negativë në testin për koronavirus gjatë pesë ditëve të kaluara.
Sakaq, të huajt që vijnë nga shtetet e vendosura në listën e kuqe, ku bëjnë pjesë edhe Kosova, Shqipëria dhe Mali i Zi, nuk do të kenë të drejtë fare të hyjnë në territorin e Hungarisë. Ndërsa të huajt që vijnë nga vendet e listës së verdhe, do të përballen me të njëjtat kushte si hungarezët, shkruan “The Guardian”.
