Vdekja e 23-vjeçarit Rafael Tafaj teksa po punonte, pa asnjë kusht sigurie, ka çuar në pranga pronarin e gomisterisë Xhemal Duka. Po kështu është proceduar penalisht shoferi i ambulancës, shtetasi T.L. 37-vjeç, pasi dyshohet se është vonuar për të shkuar në vendngjarje.
Ngjarja e rëndë ka ndodhur një ditë më parë ku i riu Rafael Tafa, humbi jetën si pasojë e shpërthimit të gomës së një kamioni. Në momentin që 23-vjeçari po rregullonte gomën e një kamioni, kjo e fundit ka shpërthyer dhe ka goditur punonjësin.
Si pasojë e plagëve të marra, 23-vjeçari ka ndërruar jetë. Ndërkohë që një dëshmitar në vendngjarje u shpreh se i riu mund t’ia dilte mbanë, nëse ambulanca nuk do të vonohej aq shumë.
Njoftimi i policisë
Gjithashtu, nga specialistët për Hetimin e Krimeve në Komisariatin e Policisë Durrës u arrestua në flagrancë për veprën penale “Shkelja e rregullave të mbrojtjes në punë”, shtetasi Xh. D., 54 vjeç, banues në Durrës, pasi ditën e djeshme, në gomisterinë në pronësi të tij, si pasojë e një shpërthimi të një gome, humbi jetën shtetasi R. T., 23 vjeç (punonjës). Për këtë rast është proceduar penalisht për veprën penale “Shpërdorim detyre”, shtetasi T. L., 37 vjeç, banues në Durrës (shoferi i ambulancës), pasi dyshohet se është vonuar për të shkuar në vendngjarje, duke sjellë vonesë për dhënien e ndihmës së parë.
