Një ngjarje e rëndë ndodhi sot në Durrës, ku një 20-vjeçar me inicialet R.T., ndërroi jetë ndërsa ishte duke rregulluar gomën e një kamioni. I riu, punonjës i gomisterisë, ishte duke rregulluar gomën kur kjo e fundit shpërtheu duke i marrë jetën. Një dëshmitar ka thënë se ka qenë pranë vendit të ngjarjes, në momentin që ka ndodhur shpërthimi fatal. Ai tregon se e ka parë me sytë e tij viktimën, që forca e shpërthimit e hodhi në një shtyllë hekuri.
Ngjarja ka ndodhur rreth orës 08:50, në lagjen nr.14/1, në zonën e Kënetës në Durrës, në ambientet e një gomisterie ku dhe ishte punësuar i riu. Në kohën kur i riu po rregullonte gomën e një kamioni, kjo e fundit ka shpërthyer dhe ka goditur punonjësin.
Njoftimi i policisë:
Më datë 06.07.2021, rreth orës 08:50, në lagjen nr.14/1, Kënetë, në ambientet e një gomisterie, duke rregulluar një gomë të një kamioni e cila ka shpërthyer, është lënduar shtetasi R. T., 20 vjeç, (punonjës), i cili si pasojë e plagëve të mara ka ndërruar jetë. Grupi hetimor ndodhet në vendngjarje dhe po punon për zbardhjen e rrethanave të ngjarjes.
