Detaje të reja të rënda kanë dalë në dritë lidhur me ngjarjen e rëndë ndodhur dje në fshatin “Asim Zeneli” në Gjirokastër, ku mbeti i vdekur si pasojë e zjarrit 64-vjeçari Andrea Haxhiaj si dhe u plagos bashkëshortja e tij. I ndjeri ishte asfiksuar nga tymi duke mbetur i bllokuar mes flakëve.
Fëmijët kanë dhënë alarmin për prindërit, nuk përgjigjeshin në telefon
Çifti ka dy fëmijë, njëri me studime në Tiranë dhe një tjetër që jeton në fshat. Ky i fundit është përpjekur të kontaktonte me prindërit në telefon, por ata nuk përgjigjeshin. Ai ka komunikuar më tej me të afërmit, ku dhe ka dhënë alarmin.
Kryefamiljari është asfiksuar nga tymi, duke mbetur mes flakëve, ç’ka vështirësoi identifikimin e tij. Bashkëshortja mori gjithashtu djegie të shumta në trup, dhe ndodhet për mjekim në spitalin e Tiranës.
Flet shoku i viktimës: Nuk kishim zjarrfikëse
Shoku i 64-vjeçarit ka thënë për ‘Report Tv’ se pasi flakët u futën brenda në fshat, nuk kishin zjarrfikëse në dispozicion, gjë që solli edhe humbjen e jetës së Haxhiajt.
“Erdhi flaka nga poshtë këtu, me erë, kishte një erë të madhe shumë dhe e shkriu në vend. Të shohim tani, sikur një fije shprese kemi. Ka dy djem, një e kishte në Tiranë të voglin në shkollë dhe në punë atje, tjetrin këtu e kishte. Në radhë të parë atë e kam shok, unë nuk jetoj këtu jam në Athinë, atë e kam shok dhe motrën e atij e kam kunatë. Një fatkeqësi e madhe! Ç’të them se këtu kishim mundësi por nuk kishim zjarrfikëse, s’kishte asgjë, arriti zjarri në mes të fshatit”, u shpreh shoku i viktimës.
