Gjatë mbledhjes së mbajtur paraditen e sotme, Qeveria e Kosovës ka shfuqizuar vendimet përmes së cilave është vendosur masa e reciprocitetit me Serbinë. Pas mbledhjes së Qeverisë së Republikës së Kosovës, kryeministri Avdullah Hoti ka thënë për mediat se i kanë hequr të gjitha pengesat me Serbinë, për të rifilluar procesin e dialogut. Ai shtoi më tej se të njëjtën gjë pret dhe nga Serbia, që dialogu të fillojë ndërmjet dy vendeve.
“Dje kemi miratuar programin e qeverisë. Kemi miratuar programin e organizimit të qeverisë në përputhje me besimin e deputetëve të Kuvendit.
Kemi hequr pengesat për procesin e dialogut, zotim ky që e kemi dhënë përpara partnerëve tanë. Tani presim që edhe pala serbe të heq pengesat që të filloj dialogu me Serbinë”, ka thënë Hoti.
Ai tha se janë të gatshëm që të ulen në tavolinë, për dialogun Kosovë-Serbi. “Jemi të gatshëm të ulemi në tavolinën e dialogut. Kryeministri në bazë të kompetencave kushtetues e udhëheq dialogun. Edhe nëse unë dua, nuk mund t’i transmetoj kompetencat e mia tek presidenti. Qeveria udhëheq dialogun dhe raporton tek Kuvendi”, ka thënë ndër të tjera Hoti.
