Kryeministri i Kosovës, Avdullah Hoti, pas kthimit nga Brukseli ka folur për procesin e dialogut të drejtuar nga BE-ja, dhe për anulimin e udhëtimit në Washington.
Hoti ka thënë se Kosova është e përkushtuar që dialogu të vijojë. Po kështu ai tha në një deklaratë për mediat se është me interes për Kosovën, që ky proces të mbyllet sa më shpejtë, duke qenë se ka interesim të madh nga BE-ja dhe SHBA-ja.
“Ne mbesim të përkushtuar për dialogun. Besojmë thellë që dialogu nuk ka alternativë. Këtë qëndrim e kam prezantuar edhe në BE.
Është me interes për Kosovën që ky proces të mbyllet sa më shpejtë, duke qenë se ka interesim të madh nga BE-ja dhe SHBA-ja. Për shkak të zhvillimeve të ditëve të fundit, ne kemi shtyrë vizitën në Washington”, u shpreh Hoti.
Ai gjithashtu ka treguar se ka qenë në komunikim intensiv me ambasadorin Grenell, për anulimin e takimit të 27 qershorit, dhe se shumë shpejtë do të caktohet data e re e takimit në Washington.
“Kam pasur komunikim intensiv me ambasadorin Grenell. Pas diskutimit që kemi pasur më të, jemi pajtuar që ta shtyjmë për një datë tjetër, që do të caktohet së shpejti. Agjenda e takimit mbetet e njëjtë, për t’i dhënë shtysë dialogut përmes zhvillimit ekonomik”, deklaroi ai.
