Japonia, është ndër vendet me dendësinë me të madhe të popullsisë në botë. Prandaj, pavarësisht zhvillimit të madh ekonomik, strehimi mbetet një nga problemet kryesore. Kjo nxiti një arkitekt të dizenjojë ndërtimin e hoteleve-kapsulë.
Dhomëzat 2 metra të gjata dhe 1.2 metra të gjera, kanë një lartësi prej vetëm 1 metër. Pra aty nuk mund të qëndroni dot në këmbë, por vetëm ulur. Ato janë të radhitura ngjitur me njëra-tjetrën, duke mos ofruar shumë privatësi.
Hoteli i parë i këtij lloji u hap në Osaka në vitin 1979, dhe ekziston ende sot. Përveç shtratit, kapsula mund të ketë, një televizor vogël, i përshtatshëm për t’u parë në pozicionin shtrirë, Wi-Fi, pasqyra, dollapë të vegjël, dhe një zile alarmi. Nuk ka banjo private, ndërsa dushi është i përbashkët. Por disa hotele- kapsulë, ofrojnë edhe sauna.
Këto lloj holetesh preferohen nga shumë japonezë, pasi janë shumë më të lirë se sa hotelet e zakonshëm. Qëndrimi një natë në to, kushton 17-35 dollarë. Nga ana tjetër ato nuk rekomandohen për njerëzit klaustrofobikë, që kanë frikë nga hapësirat e ngushta. Vitet e fundit, disa hotele ofrojnë dhomëza pak më të gjera, me dyfishin e lartësisë standarde. Por ato ofrohen me një çmim shtesë.
Hotelet-kapsulë, nuk ekzistojnë vetëm në Japoni. Kohët e fundit janë ndërtuar të tillë edhe në Hong Kong, Londër, Moskë, Amsterdam, dhe qytete të tjera të mëdha./ Tirana Today
