Mrekullitë në këtë botë janë të rralla. Ato gjithsesi ekzistojnë. Por në disa raste duhet të lejohen që të ndodhin. I tillë është rasti i amerikanit Xhorxh Pikering II nga Teksasi. Djali i tij 27-vjeçar, Xhorxh III, ishte shpallur klinikisht i vdekur, pasi kishte pësuar një goditje në tru në fillim të janarit 2015.
Mjeket e Qendrës Mjekësore Rajonale Tomboll në Hjuston, thanë se për të nuk kishte më asnjë shpresë. Ata urdhëruan heqjen graduale të pajisjeve që e mbanin formalisht në jetë.
Ish-bashkëshortja e Pikering ra dakord. I riu u vu në listën e dhurimit të organeve. Por, 59-vjeçari Xhorxh Pikering nuk ishte dakord. Në gjendje të rënduar psikologjike dhe i dehur, ai shkoi me vrap në spital.
Hyri në dhomën kur dergjej i biri, dhe me një pistoletë në dorë nisi të kërcënonte mjekët dhe infermierët. Drejtuesit e spitalit njoftuan menjëherë policinë. Ai qëndroi 3 orë mbi kokën e të birit. Njërën dorë e mbante tek arma, dhe me tjetrën shtrëngonte dorën e të birit. Ai ndjeu disa herë shtrëngimin e dorës nga i biri. Kjo ishte një shenjë që ai nuk kishte pësuar vdekje klinike. Pasi mori reagimin që donte, Pikering iu dorëzua policisë. Djali i tij doli pak ditë më vonë nga koma, dhe sot është plotësisht i shëruar.
Xhorxh Pikering II, u akuzua për sulm në rrethana rënduese. Por u lirua nga akuzat, dhe doli nga burgu në dhjetorin e atij viti. I biri tha disa javë më vonë: “Është e vërtetë që në atë rast u thye ligji, por kjo u bë për arsyen e duhur. Është detyra e një prindi të mbrojë fëmijën e tij. Unë jam sot gjallë falë dashurisë së babait tim”.
TIRANA TODAY
