Revista “Business Mag Albania” i ka kushtuar një artikull themeluesit të fondacionit “Fundjavë Ndryshe”, Arbër Hajdarit.
Në artikull flitet për mënyrën sesi ky fondacion u ngrit, duke u kthyer në një nga organizatat më të mëdha që iu vjen në ndihmë njerëzve në nevojë.
“Fundjavë Ndryshe” ka pasur një mbështetje të madhe nga individë e sipërmarrës, si dhe ka bërë disa bashkëpunime në rang global. Ndër to mund të përmendet edhe ai me kompaninë e njohur “Amazon”.
Gjithashtu në artikull flitet edhe për projektin gjigand që po merr jetë “Qendra e Solidaritetit”, ku shumë shpejt pritet të hapet një Bibliotekë dhe një Qendër Shëndetësore.
Pjesë nga artikulli:
Arbër Hajdari është themeluesi dhe drejtori ekzekutiv i organizatës jofitimprurëse “Fundjavë Ndryshe”. Ai e themeloi 4 vite më parë, ndërsa ishte ende student në Fakultetin e Drejtësisë.
Ai vendosi ta kthente në rutinë, e fundjavë pas fundjavë ftonte përmes Facebook miqtë e tij në mbledhjen e ndihmave ushqimore e veshmbathjeve për t’ua çuar familjeve në nevojë. Për më shumë, duhej një mirë-organizim. Ndaj Arbri dhe disa miq të tij themeluan “Fundjavë Ndryshe”. Me shumë mund e punë kjo organizatë pësoi një rritje të jashtëzakonshme dhe një mbështetje të madhe nga individë sipërmarrës dhe jo vetëm.
Fundjavë Ndryshe tashmë ka bërë disa bashkëpunime në rang global. Ky është një nga objektivat e organizatës. Ai me Amazon është ndër bashkëpunimet më të mëdha që është bërë dhe është punuar fort që ndihmat të vinin në kohë reale, për familjet e prekura nga tërmeti.
Të gjithë e njohim Arbrin dhe Fundjavë Ndryshe, njohim kontributin dhe vlerat që kanë dhënë dhe do të japin në shoqëri. Ata janë duke punuar për një projekt gjigand që do të ndikojë fort në shumë aspekte te shoqëria shqiptare, më së shumti në mendësinë e saj.
*e lexoni të plotë si asnjëherë tjetër, vetëm në Numrin 23 të Revistës të cilën mund ta shkarkoni direkt nga këtu
