Inspektorati Kombëtar i Mbrojtjes së Territorit ka nisur aksionin në Himarë për prishjen e banesave, në mënyrë që t’i hapet rrugë projektit të bashkisë për rikualifikimin urban të shëtitores.
Aksioni nuk është pritur mirë nga banorët, të cilët kanë kundërshtuar prishjen e banesave, duke krijuar tensione mes tyre dhe policëve.
Në vendngjarje janë forca të shumta policie, të cilët po ndjekin operacionin e IKMT-së për të shmangur një përplasje të mundshme me banorët të cilët kundërshtojnë projektin e bashkisë.
Deri më tani janë shembur 8 objekte, kryesisht dyqane dhe mure rrethuese të shtëpive, ndërsa projekti prek 80 banesa të vjetra, të cilat pritet të shemben nga realizimi i këtij projekti.
Para dy javësh, IKMT paralajmëroi banorët e Himarës se kanë 5 ditë kohë për të liruar banesat, pasi më pas do niste operacioni për shembjen e tyre.
Ky aksion ka hasur në kundërshtime nga ana e banorëve, pasi për ta nuk parashikohet dëmshpërblim sipas ligjit teksa mungojnë certifikatat e pronësisë për disa nga banesat e vjetra.
Banorët refuzuan pak ditë më parë negociatat me ministrin Gjiknuri.
Kujtojmë që plani për shembjen e këtyre banesave në Himarë ka sjellë edhe reagimin e Athinës Zyrtare, të cilët kanë kushtëzuar ecurinë e Shqipërisë drejt BE me respektimin e të drejtave të pakicës greke.
