Një pjesë e rëndësishme e vlerësimit të integritetit të takimit të luajtur më 2 korrik mes Bylisit e Tiranës do të bëhet pas dëshmisë së presidentëve të dy klubeve dhe disa lojtarëve të të dyja ekipeve.
Në FSHF u paraqitën për t’u marrë në pyetje nga Komisioni i Etikës arbitri i ndeshjes së 2 korrikut, Juxhin Xhaja dhe administratori i Vllaznisë, Suad Lici, i cili vuri në dyshim integritetin e ndeshjes.
Presidenti i Bylisit, Besnik Kapllanaj u paraqit para Komisionit të Etikës për të dhënë versionin e tij të ngjarjes, ndërsa ai i Tiranës, Refik Halili, nuk u paraqit.
Por pse Halili nuk u paraqit në FSHF?
Klubi bardheblu argumentoi mungesën me mosmarrjen e e-mail-it informues, kështu që paraqitja e Tiranës u shty për të martën tjetër në orën 14:00.
Kujtojmë se ndeshja e parë në gjysmëfinalet e Kupës së Shqipërisë, e cila u fitua 2-1 me përmbysje nga mallakastriotët në pjesën e dytë, u shoqërua me dyshime shumë të forta për trukime.
Gjithçka lindi prej lëvizjes së pazakontë të koeficientëve në kompanitë ndërkombëtare të basteve.
Shifra të konsiderueshme u luajtën për golin e avantazhit të Tiranës, ndërsa edhe pse bardheblutë ishin favoritë shumë orë përpara ndeshjes, në pjesën e dytë koeficientët që favorizonin Bylisin ranë në mënyrë të dukshme, shkruan “A2”.
