Vijojnë hetimet për pasojat që la tërmeti 6.4 ballë mëngjesin e 26 nëntorit.
Prokuroria e Durrësit ka nxjerrë ekipe në terren që prej datës 29 nëntor, për të marrë mostra në godinat e dëmtuara.
Ditën e sotme këto grupe kanë filluar hetimet në bashkinë e Durrësit. Prokurorët kanë kërkuar informacion nga zyra e Urbanistikës si dhe kanë bërë sekuestrimin e dokumentacionit përkatës për këto objekte.
“Lidhur me rastin në fjalë grupi i hetimit të çështjes po kryen veprimet hetimore përkatëse siç parashikon K.Pr.Penale dhe një ndër to është dhe kqyrja në vend ku janë konstatuar prishje dhe dëmtime të objekteve. Sipas parashikimeve ligjore kqyrjet janë shoqëruar dhe me fotografi dhe marrjen e provave të domosdoshme në vendngjarje për verifikimet e duhura që do të bëhen më pas.
Duke parë rrezikshmërinë që paraqesin objektet e dëmtuara dhe shpejtësinë që duhet për evitimin e pasojave të tjera nuk mund të bëhet sekuestrimi i këtyre objekteve, por është çmuar që pas kryerjes së veprimeve proceduriale në vendngjarje, ata (grupi hetimor), të jenë të lirë për të vendosur për vijimësinë e objektit nga instancat përkatëse sipas çdo rasti. Njëkohësisht vazhdojnë dhe sekuestrimi i dokumentacionit përkatës për këto objekte në zyrat që i administrojnë ato”, thuhet në njoftimin e Prokurorisë.
Kujtojmë se si pasojë e godinave të shembura nga tërmeti kanë humbur jetën 51 persona si dhe janë plagosur qindra të tjerë.
