Në “Historia e Fundjavës” në Klan Plus, u trajtua rasti prekës i këngëtares Luljeta Përbasha, e cila jeton në skamje dhe në një çati ku nga çasti në çast mund të shembet. Shkëlqimi dhe mjerimi i këngëtares Luljeta Përbasha, duket se përjetohet në pak minuta, aty ku jeta i dha duartrokitjet e merituara dhe më pas e gjunjëzoi para një fatkëqësie të madhe.
Luljeta Përbasha është 59 vjeç, nga Rrësheni. Ajo ka qenë këngëtare e njohur deri në vitin 1983, fituese e anketave muzikore dhe e çmimeve në festivalet kombëtarë të këngës në radiotelevizion. Ka qenë këngëtare e Estradës Profesioniste të qytetit të Rrëshenit, dhe drejtoreshë e Bibliotekës së Fëmijëve në Mirditë.
Sot ajo jeton me bashkëshortin në Bilisht, në kushte shumë të vështira ekonomike. Prej 7 vitesh Luljeta kujdeset për burrin e saj të paralizuar, i cili nuk mund të ecë, lëvizë dhe as të flasë.
Ata jetojnë në një dhomë të vogël, e cila është gati për tu rrënuar. Jeta ka kurthet e saj, dhe për Luljetën ka një lajm që do i ndryshoj jetën.
Drejtuesi i fondacionit “Fundjavë Ndryshe”, Arbër Hajdari, tha se ka nisur një fushatë për një shtëpi të re për të.
Ende ekziston solidariteti që duhet. E po kështu edhe komuniteti i artistëve në Rreshen kanë nisur mbleedhjen e parave, ku do të kontribuojnë me “Fundjavë Ndryshe”.
