Kryetari i AAK-së, Ramush Haradinaj, thotë se Gjykata Speciale është dashur të krijohet brenda Kosovës.
Në një intervistë për emisionin Pressing në T7, Haradinaj tha se AAK ishte një ndër partitë që votoi kundër themelimit të kësaj gjykate. Ai sqaron se kundërshtimet lidhur me këtë nuk ishin politike.
“Pozicionet kundërshtuese që kisha ndaj Speciales nuk ishin politike. Ne kemi një sistem ligjor shumë mirë të ndërtuar. Vetë fakti që Gjykata jonë Kushtetuese ka rrëzuar një president e tregon këtë. Unë kam folur me ndërkombëtarët. Kam kërkuar që pas 12 viteve të investimit në sundim të ligjit, dhe drejtësi në Kosovë, pse Gjykata të mos krijohet këtu. Pse Gjykata të mos krijohet përsëri me fonde të BE-së këtu me ekspertë të tyre. Por edhe me ekspertizë të tyre”, tha ai.
Sipas Haradinajt, Gjykata është selektive në punën e saj, teksa shtron pyetjen se pse nuk është krijuar një gjykatë që heton krimet e masakrave të Krushës, por vetëm ato të UÇK-së.
Haradinaj thekson se fakti që Gjykata ndodhet jashtë Kosovës, rrit edhe presionin ndaj UÇK-së në arenën ndërkombëtare.
