Inspektoriati Kombëtar i Mbrojtjes së Territorit, ka njoftuar se nesër do ndërmerret një shpërthim i telekomanduar në kafazin e ashensorit të një pallati 9-katësh, në lagjen 5 në rrugën “Hysen Myshketa” në Durrës.
Për të shmangur incidentet, njoftimi vjen ndaj të gjithë banorëve, e po kështu edhe bizneseve përreth që gjatë fashës së orarit 10:00 -17:00 të marrin masat.
Banorëve u kërkohet që gjatë këtij orari, të lënë dyert dhe dritaret hapur. Po kështu, të ulin në tokë pajisjet elektronike si dhe të largohen nga banesat dhe bizneset, pasi rrezikshmëria është e lartë.
“Në këto kushte, lajmërohen të gjithë bizneset dhe banorët e pallateve përreth që në datën 24 Nëntor 2020, nga ora 10:00 deri në orën 17:00, të marrin masa për të lënë të hapura dyert dhe dritaret, të ulin në tokë pajisjet elektronike dhe çdo pajisje tjetër që e shikojnë të arsyeshme si dhe të largohen nga banesat dhe bizneset e tyre”.
