Ministrja e Shëndetësisë, Ogerta Manastirliu, duke folur për planin e lehtësimit të masave ndaj koronavirusit në Shqipëri, tha se hapja do të jetë graduale.
Çdo aktivitet që do të hapet, duhet të zbatojë protokollet e sigurisë. Në deklaratën për mediat, ministrja tha se rastet e reja me COVID-19, tregojnë se infeksioni është aktiv.
Lehtësimi i masave do të përfshijë katër faza, ku çdo fazë do të ketë një diferencë dy javore. Fillimisht do të hapen bizneset që kanë më pak risk, për t’iu rikthyer normalitetit më tej.
“Kemi më shumë se 100 vatra infeksioni aktive në të gjithë vendin. Komiteti i Ekspertëve ka hartuar planin për lehtësimin gradual të masave. Hapja do të jetë graduale, duke nga marrë të paktën dy javë nga njëra fazë te tjetra. Fillimisht do të hapen aktivitetet me më shumë efekt në ekonomi, dhe më pak efekt në përhapjen e virusit. Rihapja e aktiviteteve do të shoqërohet me kufizime”.
Manastirliu bëri me dije se nga java e ardhshme, do të ketë liri dalje 2 orë e 30 minuta. “Nga java e ardhshme mund të lehtësojmë orarin e daljes nga 90 minuta në 2 orë e 30 minuta dhe për të lehtësuar disa biznese. Po ashtu do lejohet transporti ndërqytetës me taksi me vetëm një pasagjer. Por nëse epidemia nuk është e qëndrueshme, mund të kthehemi sërish tek orari fillestar”.
