Ministrat e Jashtëm të vendeve të BE do të vendosin sot për hapjen ose jo të negociatave për anëtarësim të Shqipërisë dhe Maqedonisë së Veriut. Ndërsa ekziston mundësia që vendimi të shtyhet për në shtator të këtij viti, pas vendimit të qeverisë së Holandës, e cila ka votuar në Parlamentin e saj kundër çeljes së negociatave për Shqipërinë, pasi e konsideron të parakohshëm.
Vendimi do të merret gjatë samitit që do të zhvillohet sot në Luksemburg. Para nisjes drejt Luksemburgut, shefja e diplomacisë europiane Federica Mogherini bëri thirrje për një vendim pozitiv për dy vendet, si vlerësim për reformat e ndërmarra.
Kujtojmë se qershorin e vitit të kaluar, vendimi u shty pikërisht për tani pas skepticizmit të tre vendeve, Holandës, Francës dhe Danimarkës. Pak javë më parë Komisionin Europian vendosi që të japë sërish rekomandimin pozitiv për çeljen e negociatave, pasi Shqipëria i ka plotësuar kushtet.
Ndërkohë, ministri i Jashtëm në Detyrë, Gent Cakaj është shprehur se pret një përgjigje pozitive për të dy vendet, ndërsa përjashton mundësinë e ndarjes së Maqedonisë së Veriut nga Shqipëria, pasi sipas tij, vendi ynë i ka përmbushur të gjitha kushtet.
