Ministrja e Shëndetësisë dhe Mbrojtjes Sociale, Ogerta Manastirliu, njofton se është hapur spitali i dytë për pacientët e prekur nga koronavirusi.
Përmes një komunikimi online, Manastirliu bëri me dije se spitali “Shefqet Ndroqi” apo i njohur si “Sanatoriumi” ka pritur ditën e djeshme pacientin e parë.
Ministrja tha se pacientja e parë ka kryer një ndërhyrje kirurgjikale e cila ka përfunduar me sukses, ndërsa theksoi se pacientët e këtij spitali janë zhvendosur në spitalin e Elbasanit.
Manastirliu tha se kjo situatë do të kalohet duke respektuar të gjithë Paktin e Madh për Shëndetin.
“Kemi hapur edhe spitalin Covid 2, spitalin “Shefqet Ndroqi” i cili ka pritur pacientin e parë. Një rast suksesi i ekipit të kirurgjisë së këtij spitali, me mjekët kirurgë, anestezistë, infermierët dhe i gjithë stafi që kanë kryer me sukses ndërhyrjen kirurgjikale tek një e re e prekur nga COVID-19.
Ne do të vazhdojmë t’ju shërbejmë me përkushtimin dhe sakrificën e mjekëve, infermierëve, epidemiologëve tanë të mrekullueshëm. Ne do të vazhdojmë t’ju mbajmë të informuar me korrektësi dhe transparencë maksimale çdo ditë, çdo orë, për çdo zhvillim. Ndërsa JU, ju do të vazhdoni të zbatoni rigorozisht masat e higjienës dhe të distancimit social, si i vetmi mjet për të ndihmuar njëri-tjetrin në këtë betejë të përbashkët”, tha ajo.
Deri më tani në Shqipëri janë konfirmuar 212 raste infektimi me koronavirus.
