Kreu i partisë ‘Zgjidhja’ Koço Kokëdhima, e ka cilësuar mbledhjen mes dy qeverive Kosovë-Shqipëri, si një spektakël që veçse na dëmton. Duke na kthyer pas në kohë dhe demostruar me anë të një fotoje, Kokëdhima shprehet se edhe në mbledhjet e tjera janë nënshkruar të njëjtat marrëveshje, por asnjëra prej tyre nuk është realizuar.
Ai thotë se Shqipëria dhe Kosova kanë që nga mbledhja e parë në Prizren më 11 janar 2014, që nënshkruajnë memorandume për transportin, doganat, tatimet, infrastrukturën, bashkëpunimin tregtar deri te fondi i përbashkët për Luginën e Preshevës. E ndërsa sot Hoti pritet që të nënshkruajë po ato marrëveshje që u firmosën prej tij si ministër i Financave në qeverinë e drejtuar nga kryeministri Isa Mustafa, në Prishtinë më 3 qershor 2016, në mbledhjen e përbashkët të qeverive. Marrëveshjet e reja janë për përballimin e COVID-19 dhe korridorin 5G.
Në analizën e tij, Kokëdhima shprehet se Shqipërinë dhe Kosovën vetëm sa e dëmtojnë spektakle të tilla propagandistike.
Statusi
Një foto dhe disa fakte për spektaklet qeveritare Shqipëri-Kosovë
Koço Kokëdhima
Shqipëria dhe Kosova kanë që nga mbledhja e parë në Prizren, më 11 janar 2014, që nënshkruajnë memorandume për transportin, doganat, tatimet, infrastrukturën, bashkëpunimin tregtar deri te fondi i përbashkët për Luginën e Preshevës.
Sot vijon spektakli i radhës. Përveç marrëveshjes së re për përballimin e COVID-19 dhe korridorin 5G, kryeministri Avdullah Hoti do të nënshkruajë po ato marrëveshje që u firmosën prej tij si ministër i Financave në qeverinë e drejtuar nga kryeministri Isa Mustafa, në Prishtinë më 3 qershor 2016, në mbledhjen e përbashkët të qeverive, siç duket në këtë foto ku ai është bashkë me homologun e Shqipërisë, Arben Ahmetaj.
Shqipërinë dhe Kosovën vetëm sa e dëmtojnë spektakle të tilla propagandistike. Shqiptarët në të dy anët e kufirit nuk kanë pritur politikanët e Tiranës dhe të Prishtinës për të fshirë kufirin mes dy vendeve. Bashkëpunimi dhe bashkimi real, kurrë nuk do të arrihet nga politika që vë barriera ekonomike, sociale dhe kulturore. Ky proces vetëm mund të vonohet, si në këto 6 vite të mbledhjeve qeveritare pa asnjë produkt, por një ditë do të bashkojë dy pjesët e një kombi që ndan të njëjtën gjuhë, gjak, kulturë, traditë, flamur, histori dhe të ardhme.
https://www.facebook.com/kocokokedhima/posts/4324325700971702
