Edhe gjatë seancës së sotme nuk kanë munguar përplasjet mes deputetit Kujtim Gjuzi dhe kryetarit të Kuvendit, Gramoz Ruçit. Gjuzi u shpreh se kishte kërkuar interpelancë me ministren Belinda Balluku, por kjo e fundit nuk ka qenë e pranishme. Mjaft i revoltuar ai tha se ministrat duhet të vinë në Kuvend, e jo të hanë dreka e darka me lekët e taksapaguesve shqiptarë.
“Kam kërkuar interpelancë me Ministren e Infrastrukturës, nuk e shoh as në këtë seancë dhe as në seancën e kaluar. Nuk kanë arsye ministri të mos vijnë këtu në momentin që hanë dreka-darka me paratë e taksapaguesve shqiptarë. PS është partia që ka pjellë ato partitë e tjera, që Kuvendin e lanë bosh”, tha Gjuzi.
Në kundërpërgjigje, kryetari i Kuvendit Gramoz Ruçi u shpreh se rregullorja për interpelancat është respektuar.
“Sa i përket financimit të partive ka një ligj, financimi bëhet për ato subjekte politike që kanë marrë pjesë në zgjedhjet paraardhëse”, u shpreh Ruçi.
