Në seancën e sotme të Kuvendit, si çdo herë nuk kanë munguar edhe replikat ndërmjet politikanëve të ndryshme. Teksa Balla i ka thurur elozhe OFL (Operacioni Forca e Ligjit) dhe paketës anti-KÇK, deputetja opozitare ka replikuar në lidhje me subjektet e veprimit të kësaj force.
Sipas Rudina Hajdarit, nëse mazhoranca ka ndërmend të luftojë KÇK si fillim duhet ta nisë nga deputetët në parlament, të cilat sipas saj nuk justifikojnë pasurinë që kanë.
“Realisht nuk e di kush ju ka ndaluar deri më sot të luftoni krimin e organizuar, që sot erdhën dhe e pompuat me këtë akt normativ. Ai ligj është parë e riparë që kur u prezantua nga kryeministri, pasi ishte antikushtetues, ishte gati të luftonte çdo kënd për të mbrojtur disa persona të caktuar.
Ju e dini shumë mirë kush janë ata që nuk e justifikojnë pasurinë. Më thoni e justifikojnë… Pse nuk flisni. Nëse vërtet doni të luftoni krimin , të çoni para Shqipërinë, të hapni negociatat, pse nuk filloni me këta njerëz që kanë vendosur pasuri të jashtëzakonshme. Ne kemi diferencë shumë të madhe me ju, s’kemi nevojë të na jepni ju mend.” – tha Hajdari.
