Kreu i Shtetit, Ilir Meta, ka zbuluar dhuratën që ka marrë nga Xhamia e Plumbit në Shkodër, ku ndodhej për të uruar Natën e Shenjtë të Kadrit. Meta thotë se ka marrë dhuratë një foto nga rihapja në 16 nëntor 1990, të Xhamisë së Plumbit në Shkodër. Në mesazhin e shpërndarë në Facebook, ai citon Myftiun e Shkodrës, Imam Muhamed B. Sytari, se “gurët dhe muret i shembën, por shpirtrat jo”, si një mesazh i koduar për shembjen e Teatrit Kombëtar.
Statusi
Shumë i lumtur që në këtë vit jubilar të 30-vjetorit të rikthimit të lirisë fetare, të merrja dje dhuratë një foto nga rihapja në 16 nëntor 1990, të Xhamisë së Plumbit në Shkodër.
2169 faltore, pjesë e trashëgimisë kulturore dhe historike të vendit u shkatërruan nga barbaria e diktaturës komuniste. Dhjetëra klerikë u martirizuan, u burgosën dhe u internuan. Por siç me të drejtë thotë edhe Myftiu i Shkodrës, Imam Muhamed B. Sytari: “Gurët dhe muret i shembën, por shpirtrat jo”.
