Për herë të dytë për këtë vit, grupi i Berishës iu drejtua selisë blu e cila ishte e mbyllur. Aldo Bumçi, Ivi Kaso dhe Gent Strazimiri tentuan që të hynin brenda, por dera nuk u hap.
Në kohën kur ata ndodheshin jashtë selisë blu, kreu i PD Lulzim Basha ishte në kafe me gazetarët. Strazimiri tha për mediat se nëse do kishte betejë, Basha nuk do ishte në kafe.
Ai u shpreh se Lulzim Basha e ka kthyer selinë e partisë në bunker, dhe se më datë 8 janar do të çlirohet.
“E keni në kafe tani, keni gjë për t’i thënë? Nuk ka punë tjetër veç se të pijë kafe. Premtoi betejë pa kompromis. Ky oborr i shkretëtirës, godina e zbrazëtisë së madhe. Nëse do kishte betejë, nuk do ishte në kafe.
Sot ky oborr do gumëzhinte nga demokratët. Asnjë demokrat s’duhet të kishte dilemën a do i hapet dera apo jo. Ky oborr i zbrazët, kjo godinë e mbyllur në këtë mënyrë tregon frikën nga demokratët, jo nga regjimi.
Janë 44 mijë vetë që duan të hyjnë në PD më datë 8. Këta thjesht kanë ndërmend ta mbajnë të zbrazët e të shkretë këtë godinë. Më datën 8 do marrin xhevapin, kjo është shtëpia e demokratëve. Kjo godinë dhe ky oborr nuk mund të rrinë të zbrazëta”, tha Strazimiri.
