Juristi Kreshnik Spahiu ka komentuar në “Euronews Albania” lënien e mandatit nga deputetja e PD-së, Grida Duma. Teksa e krahasoi Dumën me Norën e Kelmendit, Spahiu u shpreh se çdo intelektual e ka të qartë se me Sali Berishën në PD e ka karrierën të humbur. “Në fakt do të ishte detyrim i Berishës të jepte një përgjigje dhe një detyrim i gazetarëve t’i drejtonin pyetjen në këtë formë: Pse u largua Nora e Kelmendit?
Sepse nuk ka një legjendë si Nora që mund të rrijë pas ferrave të Kelmendit. Norat mund të rrinë në majat e Kelmendit. Çdo intelektual e di që me Berishën, një karrierë është e humbur”, tha Spahiu.
Sipas Spahiut, largimet nga PD tregojnë se drejtimin dhe shumicën e kësaj partie e dominon Berisha.
Kryedemokrati Sali Berisha e ka vlerësuar Grida Dumën për përgjigjet që i jep Edi Ramës, ndaj është shprehur se nëse do të kishte një emër të dytë, do të quhej Nora e Kelmendit.
“Po të kishte një emër të dytë do të quhej Nora e Kelmendit. Me përgjigjen epike dhe jashtëzakonisht të merituar që i dha Edi Ramës në Parlament, pasi ai përdori një gjuhë që kurrë nuk mund ta përdorte.
Grida i dha përgjigjen më të merituar atij. Pavarësisht se të kërkosh burrëri te ai që nuk e ka se ai që flet në atë mënyrë nuk ka asgjë në kuptimin e integritetit dhe virtyteve. Por i dha përgjigjen e merituar. Grida i tha se aparatin tretës e ke në tru. Sa herë del atje të gjithë shqiptarët e shohin me këtë anomali”, ka deklaruar më herët Berisha.
