Grida Duma ka lënë mandatin e deputetes. Lajmin e bëri me dije në një deklaratë për mediat nga Kryesia e Kuvendit. Duma po e lë mandatin e deputetes, për t’iu futur botës së televizionit.
Mandati i Grida Dumës i kalon Ori Nebiajt, pasi në zgjedhjet e 2021 ka siguruar 5599 vota preferenciale. Ende nuk dihet nëse Nebiaj do ta pranojë mandatin, pasi ajo gjithashtu është e angazhuar në botën e televizionit.
Me një fjalim të gjatë, demokratja Grida Duma u shpreh se pavarësisht zhgënjimeve të mëdha, pengjeve, mundit e sakrificës do jetë përjetësisht e djathtë, sepse këtë bindje politike ka dhe ka pasur gjithnjë.
“Kur më goditën personalisht, e unë e di pse sepse nuk gjetën kurrë një aferë korrupsioni apo një ndyrje duarsh. E pikërisht për këtë jam sulmuar nga hienat. E kam ditur që do e paguaj këtë kosto në këtë vend, i cili nuk ka etikë. Sot nuk do ia fal kurrë, që ndoshta do mbetet pengu im që nuk do ia fal kurrë. Politika e llumit goditi nën brez tim bir, këtë nuk do ja fal kurrë politikës së llumit. Shpresoj që edhe atij ti bëhen mësim klounët siç mu bën mua. Nuk e kam lënë dhe nuk do ta lë betejën, me bashkëpunëtorë e demokratë”, tha Duma.
Grida Duma njoftoi se ka dorëzuar shkresën për lënien e mandatit të deputetit.
“Kam dorëzuar shkresën për lënien e mandatit. Pas një reflektimi të gjatë, reflektim që vjen pas një përpjekje të gjatë për të bërë të duhurën për partinë time dhe votuesit që përfaqësoj, ky është vendimi i duhur.
Mendoj që në politikë fatet e individit vlen të konsiderohen dhe rimendohen vetëm kur ato shkojnë në një kahje me fatet e njerëzve dhe vendit, kurrë e kundërta megjithëse e kanë bërë shpesh të kundërtën.
Fati i njerëzve që përfaqësoj është misioni i vetëm që i përgjigjem. Më e thjeshta për mua do ishte të kisha qëndruar të prisja të mos ndodhin dështimet që disa u parashikojnë, siç e di që ka edhe nga ata që presin skutave për shansin e humbur. Mund të qëndroja për të mbijetuar, duke vegjetuar. Shumë vite në politikën e vijës së parë nuk i jam larguar përgjegjësisë e as betejës”.
