Kryeministri Edi Rama ka akuzuar Presidentin e Republikës, Ilir Meta për protestën që po zhvillohet në aeroportin e Rinasit.
Sipas Ramës, me reagimet e bëra nga Meta në lidhje me këtë ngjarje, konfirmojnë faktin se ai është nxitës i kësaj goditjeje të çmendur.
”Humoret vulgare të IM ndërkohë që një grup i nxitur prej tij dhe Saliut, kanë kryer aktin e rëndë të bllokimit të aktivitetit të aeroportit “Nënë Tereza”, thjesht rikonfirmojnë se IM është nxitës i kësaj goditjeje të çmendur e s’ka shqiptar që s’e kupton pse! Po s’do ia dalin jo!’’, shkruan Rama në rrjetin social, Twitter.
Humoret vulgare të IM ndërkohë që një grup i nxitur prej tij dhe Saliut, kanë kryer aktin e rëndë të bllokimit të aktivitetit të aeroportit “Nënë Tereza”, thjesht rikonfirmojnë se IM është nxitës i kësaj goditjeje të çmendur e s’ka shqiptar që s’e kupton pse! Po s’do ia dalin jo!
— Edi Rama (@ediramaal) April 7, 2021
Shqipëria i ka të mbyllura të gjitha fluturimet hyrëse dhe dalëse nga Rinasi për një afat të pacaktuar.
Kjo për shkak se 65 kontrollorët e Albcontrol, një kompani me kapital 100% shtetërore, refuzuan të dilnin në punë pasi firmosën edhe deklaratën e paaftësisë në punë.
Ata kërkojnë që paga e tyre të vazhdojë si përpara pandemisë në mbi 4 mijë dollarë dhe për këtë kërkojnë ndërhyrjen e ministrisë së Energjisë dhe Infrastrukturës.
Ministrja Belinda Balluku shkoi vetë fillimisht në Rinas ku bisedoi me kontrollorët por mbledhja dështoi dhe fluturimet vijuan të jenë të mbyllura.
