Specialistët grekë paralajmërojnë se ndoshta duhet shqyrtuar edhe mbyllja e përkohshme e kufijve me vendet e Ballkanit.
Specialisti i sëmundjeve infektive, Charalambos Gogos ka shprehur shqetësimin e tij në lidhje me turistët e ardhur nga Serbia, por edhe me personat që vijnë nga Shqipëria.
“Vendet fqinje me ne janë më të rrezikshmet. Psh nga Shqipëria kishim edhe raste nga greke që shkuan atje edhe në Patra trajtuam në spital pacient që shkoi në Shqipëri dhe është në gjendje serioze ndërsa edhe familjaret janë gjetur pozitive. Ka të dhëna që po vijnë raste të prekurish nga Shqipëria. Kemi edhe problemin e punëtorëve sezonal që vijnë nga Shqipëria. Por Serbia është problem kryesor në këto momente. Dhe vlerësoj se duhet të mbeten të mbyllura kufijtë deri ne 15 korrik siç është vendosur”, tha ai për televizionin privat SKAI.
Edhe zyrtarët e qeverisë greke po e shohin si mundësi mbylljen totale të kufijve tokësore ballkanike. Ata sqarojnë se kjo masë ekstreme do të merret vetëm në rast të një rritje kolosale të rasteve. Problematika e re është edhe karantinimi i të gjithë turistëve që rezultojnë pozitiv, pasi mbërrijnë.
Shqetësim ka pasur në rastin e disa turistëve që u testuan dhe dolën pozitivë në ishullin e Thasos në verilindje të Greqisë dhe në Kavala. Të gjithë ata ishin asimptomatikë dhe nuk dihet se me sa persona të tjerë kanë kontaktuar.
Vlen të përmendim se ditët e fundit thuajse 60% e rasteve të të prekurve që deklarohen në Greqi janë turistë.
