Greqia ka raportuar rastin e parë të variantit të koronavirusit Omicron në ishullin e Kretës, njoftoi sot në mëngjes Ministri grek i Shëndetësisë, Thanos Plevris.
Pacienti në fjalë udhëtoi për në vend nga Afrika e Jugut më 26 nëntor, sipas Theoklis Zaoutis, kreu i organizatës së shëndetit publik të Greqisë. Pas mbërritjes, pacienti i infektuar bëri një test të shpejtë i cili doli negativ. Pas testimit të përditshëm, ai doli pozitiv më 29 nëntor dhe varianti Omicron u zbulua sot.
Simptomat e tij mbeten të lehta, dhe ai është vendosur në karantinë. Zaoutis shtoi se megjithëse ka ende boshllëqe dhe nevojiten më shumë informacione rreth variantit të ri, “vaksinat mbeten arma kryesore”, ndërsa u bëri thirrje të gjithëve të vaksinohen.
Greqia kohët e fundit njoftoi vaksinimet e detyrueshme për qytetarët mbi moshën 60 vjeç. Qytetarët që nuk kanë rezervuar dozën e tyre të parë deri më 16 janar, do të përballen me një gjobë mujore prej 100 € (113 dollarë).
