Presidenti Meta ka zhvilluar një takim me ministrin e Jashtëm të Greqisë, Nikos Dendias.
Në takimin e bërë në Presidencë, tema kryesore ishte tërmeti shkatërrimtar që goditi Durrësin dhe Thumanën, duke shkaktuar mbi 20 viktima deri më tani.
“Jemi të bindur se kjo vizitë do t’i shërbejë sensibilizimit të mëtejshëm edhe të Komunitetit Ndërkombëtar për të na ndihmuar edhe më shumë në orët dhe ditët në vijim që ta përballojmë këtë situatë mjaft të rrezikshme në mënyrë që të reduktojmë pasojat në radhë të parë të viktimave dhe rikuperimit të dëmeve”, tha kreu i shtetit.
Ndërkohë, ministri i Jashtëm grek deklaroi se Greqia është e gatshme të ofrojë çdo ndihmë për vendin fqinj. Ai theksoi se 2 ekipe ndihme kanë mbërritur tashmë në Shqipëri.
“Faleminderit shumë që më pritët. Janë çaste të vështira për ju dhe Shqipërinë. Kam ardhur në emër të kryeministrit për t’u përcjellë ngushëllimet më të thella për ju dhe popullin tuaj dhe për të ofruar ndihmesën tonë për këto çaste nevoje. Greqia ka një përvojë të gjatë nga tërmetet. Ndërkaq dy ekipe janë këtu për t’ju ndihmuar. Jemi gati t’ju ndihmojmë për çfarë do lloj çështje. Jemi këtu për t’ju ndihmuar në çfarë do lloj mënyre. Më lejoni t’ju shpreh ngushëllimet popullit shqiptar”, theksoi ai.
