Autoritete greke kanë goditur një grup të strukturuar kriminal, që trafikonte lëndë narkotike nga Holanda në ishullin e Mykonos. Ky grup kriminal, drejtohej nga një shqiptar, i identifikuar si Gjergji Kapaj, 43 vjeç.
Si rezultat i operacionit të zhvilluar në vendin fqinj, është bërë i mundur arrestimi i pesë personave, teksa është bërë edhe sekuestrimi i një sasie lënde narkotike, disa armëve dhe automjeteve, shkruan Protothema.
Ndërkohë, bëhet me dije se policia përdori dronët për të kontrolluar të gjitha lëvizjet e anëtarëve të bandës shqiptare.
Mediat greke e kanë cilësuar grupin shqiptar si “unazë” të trafikut në Mykonos, ndërsa drejtuesin Kapaj, një kriminel të rrezikshëm, të skeduar për disa ngjarje por që ka aritur t’i shpëtojë policisë në të shumtën e rasteve.
Si nisën hetimet për bandën shqiptare
Hetimi për grupin filloi në tetor 2020 kur një ankesë arriti në Departamentin e Sigurisë së Atikës në lidhje me disa shqiptarë, të cilët ishin aktivë në trafikimin e sasive të drogës, kryesisht kokainë, në Athinë dhe po përgatisnin një degë në Mykonos.
Hetimi zbuloi ekzistencën e një grupi kriminal, të strukturuar në mënyrë operative dhe me veprimtari të vazhdueshme kriminale, anëtarët e të cilit trafikonin kokainë dhe kanabis.
Në fund të muajit prill, anëtarët e bandës realizuan blerjen dhe transportin e 3 kilogramëve kokainë prej 28,000 euro për kilogram nga Holanda dhe e transportuan duke e fshehur në një makinë, ndërsa dega e grupit në Mykonos funksiononte me “klientë të zgjedhur”.
Në të njëjtën kohë, në Athinë u kap “truri” i grupit kriminal, i cili fillimisht refuzoi kontrollin nga policia duke ikur me vrap, por u prangos pas ndjekjes.
