Në rast se Kosova nuk heq taksën 100% ndaj mallrave serbe, Shtetet e Bashkuara të Amerikës do të ndërpresin të gjitha investimet strategjike në Kosovë. Ky lajm është bërë i ditur nga Televizioni Kombëtar i Kosovës, sipas të cilit, SHBA-ja do të ndërpresë çdo investim në projekte të rëndësishme derisa të hiqet taksa.
Sipas RTK, ambasadori i SHBA-së njëkohësisht dhe i dërguar special i presidentit Trump për dialogun Kosovë-Serbi, Richard Grenell, ka pasur një komunikim të ashpër me Kryeministrin e Kosovës, Albin Kurtin, si dhe Kryetaren e Kuvendit të Kosovës, Vjosa Osmani. Ai u ka bërë të qartë se SHBA-ja është e gatshme të bëjë investime milionëshe në Kosovë, por vetëm nëse hiqet taksa. Në rast të kundërt Kosova do të vuajë pasojat e refuzimit.
“Megjithatë, SHBA-ja do t’i anulojë të gjitha këto projekte deri sa Qeveria nuk heq dorë nga plani për reciprocitetin dhe taksa ndaj mallrave serbe”, ka thënë një burim për RTK.
