“Gratë mund të mbeten shtatzënë, nëse notojnë në një pishinë me burrat”, zyrtarja hiqet nga puna

Një zyrtare e mbrojtjes së fëmijëve në Indonezi, e cila u shpreh se gratë mund të mbeten me barrë edhe nëse notojnë në të njëjtën pishinë me burrat, është shkarkuar nga posti i saj.

Teksa këshillonte gratë kundër shtatzënive të padëshiruara, Sitti Hikmawatty tha se gratë  mund ta pësojnë edhe “pa depërtim”, nëse bënin banjë në ujë me seksin e kundërt.

Këto deklarata të saj u bënë objekt talljesh në rrjetet sociale, ndërsa autoritetet vendase nisën hetimet. Këta të fundit i dhanë asaj dy mundësi zgjedhjeje: të jepte dorëheqjen ose të shkarkohej.

Sitti Hikmawatty kishte dhënë një intervistë muajin e kaluar, ku ishte shprehur:

“Ka një tip veçanërisht të fortë të spermës së mashkullit … që mund të shkaktojë shtatzëni edhe në një pishinë banje. Edhe pa depërtim seksual, burrat mund të pësojnë eksitim dhe ta lëshojnë në ujin e pishinës, duke shkaktuar shtatzëni të padëshirueshme. Askush nuk e di me siguri sesi reagojnë burrat kur shikojnë gratë në një pishinë publike.”