Këshilli i Ministrave ka miratuar një vendim për përzgjedhjen e një kompanie të huaj juridike që të konsultojë qeverinë shqiptare për problemet e marrëveshjes që ka me kompaninë koncesionare ‘TIA’.
Kjo kompani e huaj do të përzgjidhet nga Avokatura e Shtetit, e cila do të ngrejë një komision për procedurën e përzgjedhjes së zyrës.
Sipas vendimit të Këshillit të Ministrave, kostot financiare për konsulencën do të mbulohen nga buxheti i shtetit, ndërsa kontraktimi i zyrës së avokatisë së huaj do të bëhet përmes konkurrimit.
Vendimi është botuar në Fletoren Zyrtare dhe ka hyrë në fuqi.
Ndërkohë, deri më tani për grabitjen e aeroportit ndërkombëtar “Nënë Tereza”, janë arrestuar pesë persona, mes tyre dy nga grupi që ishin brenda në aeroport dhe tre bashkëpunëtorë, ndërsa shtatë persona të tjerë janë shpallur në kërkim.
