Kryeministri Edi Rama ka folur lidhur me lajmin e bujshëm se humbja e gjyqit ndaj biznesmenit italian Francesco Becchetti i ka shkaktuar shtetit shqiptar më shumë se 100 milionë euro.
Vendimi thuhet se është marrë më 24 prill në një proces të zhvilluar në Gjykatën e Arbitrazhit Ndërkombëtar (ICSID) në Uashington.
I pyetur nga gazetari Bejtja në studion e “Opinion”, kryeministri Rama nuk e mohoi, por as nuk e pohoi këtë lajm:
“Në arbitrazh ka një klauzolë konfidencialiteti që deri në mbarim të procesit, palët nuk shprehen. Ka një klauzolë konfindecialiteti që i obligon palët të mos shprehen pasi është gjykata që në përfundim të procesit do të shprehet. Për momentin kemi portalet”, ka thënë shefi i qeverisë, duke lënë të kuptohet se nuk ka ende një vendim përfundimtar.
Ditën e djeshme ka pasur reagime të shumta nga personazhe publikë, mes tyre edhe gazetarja e televizionit të mbyllur Agon Channel, Sonila Meço, e cila tha se ky dëm shkon në kurriz të të gjithë shqiptarëve.
