Pas shpalljes së garës për anëtarë të Gjykatës Kushtetuese, Këshilli i Emërimeve në Drejtësi u është drejtuar me një kërkesë institucioneve ku kërkon informacion nga institucionet e tjera nëse kandidatët për gjykatën më të rëndësishme në vend, kanë qenë ose jo anëtarë të partive politike.
Në bazë të Kushtetutës, posaçërisht pika 5 e nenit 125, gjyqtarët nuk duhet të kenë mbajtur pozicione në një parti politike gjatë 10 viteve të fundit përpara kandidimit si anëtar të Gjykatës Kushtetuese.
Në kërkesë drejtuar partive politike, thuhet: “Këshilli i Emërimeve në Drejtësi kërkon nga institucioni juaj të dhëna të plota zyrtare të shoqëruara me dokumentacionin përkatës, nëse secili nga kandidatët sikurse tregohen në listat e kandidatëve, ka mbajtur pozicione drejtuese në partinë tuaj politike duke filluar nga viti 2008”.
Duke qenë se Gjykata Kushtetuese është në mungesë totale funksionimi, në dokumentin e KED-së, siguruar nga “Panorama”, kërkohet trajtimi i kërkesës me përparësi nga ana e partive politike, duke kërkuar përgjigje brenda datës 6 maj, pra ditës së sotme./ Panorama
