Fjolla Morina i është drejtuar sërish maternitetit, ku do t’i nënshtrohet një vizite të dytë për të vërtetuar nëse është shtatzënë, siç ajo pretendon ose jo.
Ajo u arrestua të shtunën, për shkak të një arme pa leje që u gjet në makinën e saj, ku po kalonte kufirin e Shqipërisë së bashku me dy shtetas të Kosovës.
Këngëtarja ka dalë sot para Gjykatës së Kukësit, për t’u njohur me masën e sigurisë, për armëmbajtje. Vendimi për të ishte parashikuar të jepej në orën 08:20, por seanca u shty për në orën 13:00.
Prokuroria ka kërkuar caktimin e masës së sigurisë “arrest me burg”, por e akuzuara ka kërkuar që t’i jepet “arrest shtëpie” me pretendimin se është shtatzënë dhe për këtë ka paraqitur një eko.
Për këtë arsye, prokuroria ka kërkuar që të paraqitet në seancë një mjek gjinekolog, me argumentin se një eko nuk mund të mjaftojë për të vërtetuar se është shtatzënë. Nëse gjykata merr një vendim më të lehtë se ‘arrest me burg’, atëherë prokurori ka kërkuar një garanci shtesë pasurore prej 5 mln lekë.
