Ditën e sotme, Gjykata e Kukësit ka dhënë masën e sigurisë për 4 të arrestuarit, për ngjarjet e tensionuara në KZAZ nr.11, në Kukës.
Gjykata ka vënë masën e sigurisë ‘Arrest shtëpie’ për A. C., 46-vjeç, banues në Kukës, shofer në Bashkinë e Kukësit, E. H., 42 vjeç, banues në Kukës, shofer në Bashkinë e Kukësit. E. B., 26 vjeç, Inspektor i Policisë Bashkiake dhe E. M., 35 vjeç, banues në Kukës.
6 pjesëmarrës të tjerë janë shpallur në kërkim, ndërsa 4 janë proceduar në gjendje të lirë. Më herët policia e Kukësit arrestoi një punonjës bashkie i cili ishte shpallur ne kërkim për ngjarjen në KZAZ 11. Materialet zgjedhore që u hoqën me marrëveshje nga KZAZ-ja aktualisht ndodhen në ruajtje në ambientet e Prefekturës Kukës.
Kryetari i Bashkisë Kukës Bashkim Shehu, reagoi për arrestimin e qytetareve dhe punonjësve të Bashkisë, duke u shprehur se kryeministri Rama ishte ai që e nxiti këtë ngjarje.
“Kukësin mjaft e kanë djegë qeveritë e huaja, nuk e toleron të digjet nga qeveria shqiptare.
Sa ishte në fuqi Dekreti i Presidentit, Bashkia Kukës po bashkëpunonte korrekt me qeverinë dhe institucionet e saj për zgjedhjet”, deklaron Shehu.
Dekreti i Presidentit për anulimin e zgjedhjeve, çoi në këmbë shumë opozitarë nga bashki të ndryshme në mbarë vendin, të cilët kërkuan heqjen e materialeve zgjedhore nga KZAZ-të përkatëse.
Bashkia e Kukësit ishte një nga të para e cila kërkoi nga KQZ heqjen e materialeve zgjedhore nga KZAZ-ja nr.11.
Postimi i plotë i Bashkim Shehu:
Në Bashkisë Kukes janë arrestuar nga policia Ersi Biçaku polic bashkiak, Ahmet Cahani dhe Ermal Haziri shoferë sherbimesh, Lulëzim Shehu punëtor gjelbërimi, Ervin Meshi banor i Kukësit.
Qeveria nuk duhet të ndërsejë as policinë e as organet e drejtësisë kundër kuksianëve, pasi qeveria ikën e ndërrohet shpejt një ditë, por kuksianët do të mbeten këtu ku janë, qofshin protestues, qofshin policë, gjyqtarë apo prokurorë.
Nëse qeveria mendon ta djegë me gaz e napal vendin dhe të ngrohë duart e saj në atë flakë, sigurisht që në Kukës ajo do të digjet në zjarrin që po ndez vetë.
Kukësin mjaft e kanë djegë qeveritë e huaja, nuk e toleron të digjet nga qeveria shqiptare.
Sa ishte në fuqi Dekreti i Presidentit, Bashkia Kukës po bashkëpunonte korrekt me qeverinë dhe institucionet e saj për zgjedhjet.
Tani që nuk ka datë zgjedhjesh, të cilën e cakton vetëm Presidenti në bazë të Kushtetutës, Bashkia e Kukësit nuk mundet të bëjë shkelje ligjore e të përfshihet në një proces zgjedhor të paligjshëm dhe nul.
Në Shqipërinë pluraliste pushtetet janë të ndara dhe Bashkia e Kukësit nuk bëhet dot palë me qeverinë Rama që synon ta fshijë e ta zhbëje pushtetin kushtetues të Presidentit të vendit, i cili është i vetmi institucion që Kushtetuta i jep tagrin të caktojë daten e zgjedhjeve.
Në zbatim të Dekretit presidencial, Bashkia e Kukësit nuk mund të lejojë që të ketë votime të paligjshme si në kohën e diktaturës kur votohej 99/99 %, por nuk kishte zgjedhje se nuk kishte rivalë.
Dekretet e Presidentit të cilat ne i zbatojmë, nuk janë lënë të gjykohen nga qeveria e as nga institucione periferike të saj.
Dekreti i Presidentit që thotë se nuk ka zgjedhje me datën 30 qershor 2019 do të zbatohet rigorozisht nga Bashkia Kukës, në gjithë territorin e Bashkisë dhe jo vetëm në objektet në pronësi të Bashkisë.
Nëse qeveria ka ndonjë paqartësi për këtë, ta cojë ceshtjen në Gjykatë Kushtetuese, pasi qeveria dhe asnjë institucion vartës i saj nuk është Gjykatë Kushtetuese.
