Zëdhënësi i Gjykatës së Apelit, Arbër Jashari ka bërë me dije se ish-kandidati për deputet i Nismës Socialdemokrate, Haxhi Hoti është rikthyer në burg.
Mediat kosovare bëjnë me dije Gjykata e Apelit ka aprovuar ankesën e Prokurorisë së Shtetit që ta shfuqizojë masën e sigurisë që Gjykata Themelore e Prishtinës ndërmori javën e kaluar ndaj Hotit.
Kështu Haxhi Hotit iu komunikua masa arrest për 30 ditë, për shkak të deklaratave që ai bëri ndaj Albin Kurtit duke u shprehur se ai duhet të ikte nga Kosova, ose të vritej.
“Është aprovuar ankesa e prokurorisë, pas vendimit të gjykatës së shkallës së parë. Të pandehurit në fjalë i është caktuar masa e paraburgimit prej një muaji, duke u llogaritur nga dita e arrestimit”, ka deklaruar Jashari.
