Në muajin dhjetor të vitit 2020 është finalizuar një operacion ndërkombëtar antidrogë në Belgjikë dhe Gjermani, ku janë arrestuar 6 ‘kokat’ shqiptare, mes tyre nipi i deputetit Rraja. Bëhej fjalë për një operacion ndërkombëtar antidrogë mes Shqipërisë, Belgjikës dhe Gjermanisë, në kuadër të të cilit kanë rënë në pranga 6 shqiptarë dhe dy të huaj, si dhe janë sekuestruar rreth 232 kilogramë kokainë (në total 1.2 tonë), një armë zjarri pistoletë, si dhe rreth 200 mijë euro.
Në pranga ranë shtetasit Musa Gjikola, Genti Balliu alias Flamur Balliu, Ramazan Rraja, Fjoralb Rraja, Bledar Pepaj, Fatmir Xhecuka. Ramazan Rraja është nipi i deputetit te PS-së, Rrahman Rraja, kurse Fjoralb Rraja është i afër i deputetit.
Lajme të reja kanë ardhur në lidhje me këtë çështje. Gazetari investigativ Artan Hoxha ka bërë me dije se Ramazan Rraja është liruar nga qelia, me vendim të gjykatës belge një ditë më parë.
“Dje gjykata belge ka vendosur që Ramazan Rraja nuk është pjesë e këtij grupi. Nga “arrest me burg” është lënë në “detyrim paraqitje”. Është liruar dje nga gjykata në Bruksel. Nuk janë gjetur prova që ky është pjesë e këtij grupi kriminal. Në Belgjikë kjo është çështje në hetim. Një shtetas lituanez është vrarë me porosi të mafies ruse. Ne marrim një rast atje dhe e përdorim në Shqipëri”, deklaroi Artan Hoxha në studion e “ABC”.
