Në një takim në Korçë, ku ka takuar funksionarë të Policisë së Shtetit, Ministri i Brendshëm Sandër Lleshaj, ka folur lidhur me akuzat e opozitës se Gjovalin Loka ka qenë bashkëpunëtor i Sigurimit të Shtetit. Lleshaj ka thënë se mban përgjegjësi për emërimin e tij, duke shtuar se vlerëson maksimalisht punën e Lokës.
Në vendimin e Komisionit të Jashtëm të Vlerësimit në Policinë e Shtetit, thuhet se Gjovalin Loka ka nivel të besueshëm në vlerësimin e pasurisë, ka nivel të besueshëm në vlerësimin e kontrollit të figurës dhe ka nivel të mjaftueshëm në vlerësimin e aftësive profesionale.
“Mbaj përgjegjësi për emërimin e Gjovalin Lokës si drejtor në Policinë e Shtetit. Unë e kam emëruar dhe mbaj përgjegjësi për të, dhe kam vlerësimet maksimale për punën e tij. Akuzave të opozitës nuk iu përgjigjem”, ka deklaruar Lleshaj.
Deklarata u bë në Korçë, ku ministri Lleshaj mori pjesë në prezantimin e forcave të reja policore që janë shtuar në radhët e policisë kufitare, forcave Shqiponja, të cilat u shtuan me 50 efektivë të rinj.
