Prej fillimit të muajit korrik, në Shqipëri ndalohet përdorimi i qeseve plastike. Në të kundërt gjobat variojnë nga 10 milionë deri në 15 milionë lekë të vjetra.
Eksperti i riciklimit, Enriko Ceko në një intervistë për Tirana Today thotë se kjo është një nismë e cila do të ndikojë pozitivisht, por problemi kryesor qëndron te ricikluesit që ndodhen në Shqipëri. Të cilët sipas tij, nuk janë duke funksionuar.
“Edhe më parë ka qenë një VKM që ndalonte qeset nën 15 mikron, por kush e dinte?! Tani nuk është bërë gjë tjetër, veçse është rritur dhe është bërë në 35 mikron. Por, ndryshimi kësaj radhe janë gjobat. Të cilat janë pjesë e këtij sistemi të vjeljes së parave për të mbushur buxhetin e shtetit, si edhe për të dhënë një mësim. Problemi qëndron se 35% e shqiptarëve janë në nivel të lartë varfërie. Atëherë si mund t’i paguajnë këto nivele të lartë të taksave, përfshirë edhe gjobat?!”
Qeset të cilat ndalohen janë nën 35 mikron dhe nuk kanë vlerë në riciklim. Por, çfarë do të ndodhë me këto qese?
“Ne kemi dy opsione të cilat ne i përdorim sot, ato janë landfilli dhe incenerimi. Përderisa industria e riciklimit nuk funksionon, kjo është ajo që mbetet. Çështja është që në Shqipëri nuk është se nuk funksionon sistemi i qeseve plastike, por këtu nuk funksionon i gjithë sistemi. Përse ne nuk ndjekim atë që ka bërë Evropa, e cila ka hedhur në treg qese plastike që janë lehtësisht të tretshme në natyrë dhe të riciklueshme.”
Por, edhe pse kjo çështje përflitet prej kohësh dhe ndëshkimet që parashikon ligji janë të rënda, ministria e Mjedisit nuk ka bërë fushata sensibilizuese me bizneset.
“Politika shqiptare nuk ka lidhje të forta me publikun e qytetarët e vetë. Kjo tregon që njerëzit të cilët drejtojnë Shqipërinë, e janë atje lartë; as nuk e kanë idenë se çfarë ndodh poshtë. Por, ne në radhë të parë duhet të krijojmë atë kulturën e riciklimit te të gjithë qytetarët.” TIRANA TODAY
