Gjatë fundjavës që lamë pas, Policia Rrugore ka gjobitur mijëra drejtues automjetesh dhe pezulluar dhjetëra patenta.
Në zbatim të planit operacion “Tispol”, policia zhvilloi kontrolle të organizuara në të gjithë vendin, duke përdorur mjetet speciale për kontroll. Me qëllim rritjen e sigurisë në rrugë, disiplinimin dhe parandalimin e shkeljeve të rregullave të qarkullimit rrugor.
Sipas njoftimit të policisë, 31 drejtues mjetesh përfunduan në pranga, 16 vetëm në Tiranë, 186 patenta të pezulluara dhe 4 624 masa administrative të vendosura për shkelje të ndryshme të Kodit Rrugor.
Po ashtu, iu është pezulluar leja e drejtimit 74 shoferëve, të cilët drejtonin mjetin nën efektin e alkoolit. Ndërsa u konstatuan me radar 76 drejtues mjetesh, të cilët qarkullonin me shpejtësi që varionte nga 140 km/h deri në 174 km/h.
Janë pezulluar dhe dërguar në OASH edhe 36 drejtues mjetesh, për shkelje të tjera që parashikohen nga Kodi Rrugor, me masë ndëshkimi pezullim patente. Janë vendosur 646 masa për përdorim celulari gjatë drejtimit të mjetit, të cilat evidentuar nga shërbimet e kombinuara me punonjës policie civilë.
321 masa për mospërdorim të rripit të sigurimit, 578 për parakalime të gabuara, 87 për mosvendosje të kaskës mbrojtës, 11 për gara shpejtësie, ndërsa pjesa tjetër prej 2 981 masash administrative janë vendosur për parkime të gabuara e shkelje të tjera.
