Një veteran 99-vjeçar i luftës ka mbledhur më shumë se 6 milion dollarë donacione për Shërbimin Kombëtar të Shëndetit. Dhe këtë gjë e ka bërë në mënyrën më fantastike, duke ecur në kopshtin e tij.
Tom Moore, i cili në 30 prill do të festojë 100-vjetorin e filloi sfidën të enjten e kaluar për të mbledhur para për ‘NHS Charities Together’. Fondacion i cili mbledh fonde për spitalet në Mbretërinë e Bashkuar, përfshirë stafin, vullnetarët dhe pacientët e prekur nga kriza e koronavirusit.
Qëllimi i tij fillestar ishte të mblidhte më shumë se 1,000 dollarë deri në ditëlindjen e tij të 100-të, duke bërë çdo ditë nga 10 xhiro në kopshtin e tij, në Yorkshire, në veri të Anglisë.
Por brenda 24 orësh ai e tejkaloi atë objektiv dhe dhurimet kaluan shifrat marramendëse. I moshuari planifikon që të arrijë të bëjë 100 xhiro deri në 30 prill. Moore është trajnuar si inxhinier civil para se të regjistrohej në ushtrinë britanike gjatë Luftës së Dytë Botërore, ku shërbeu në Indi, Indonezi dhe Britani.
Fondacioni ‘NHS Charities Together’, ku edhe do të shkojë shuma e mbledhur është shprehur e mahnitur nga ky gjest.
“Për ne është një frymëzim shumë i madh dhe jemi më të vërtetë të përulur.”
Gati 170,000 njerëz nga e gjithë bota kanë dhuruar në faqen e tij të mbledhjes së fondeve që kur u krijua javën e kaluar.
Arsyeja primare pse 99-vjeçari filloi të mbledhë fonde, ishte për të falënderuar stafin “e mrekullueshëm” mjekësor. Pasi ishin këta të fundit që e ndihmuan atë në trajtimin e kancerit.
I njohur në rrjet si Kapiteni Tom, ai është shprehur se qëllimi i tij është të kalojë edhe objektivin prej 100 xhirove.
“Kur mendoni se për kë do të shkojnë këto para – të gjithë ata mjekë dhe infermierë të guximshëm që ne kemi – unë mendoj se ata meritojnë çdo qindarkë. Dhe shpresoj se do të arrijmë edhe më shumë për ata.
Ne duhet të ecim përpara dhe t’i themi vetes që gjëra më të mira do të vijnë. Kemi pasur probleme më parë, por i kemi kapërcyer ato. Ashtu siç do të bëjmë edhe me këtë situatën që po kalojmë.”/ Burimi: BBC, Përshtati: Tirana Today
