Gjermania ka ashpërsuar masat, dhe qëllimi është kufizimi i kontakteve, që të mos mbingarkohet sistemi shëndetësor. Në veçanti puna e stacioneve intensive.
Prej së hënës në Gjermani kanë nisur të aplikohen masat e reja në luftimin e pandemisë. Fillimisht këto masa do të zbatohen për katër javë. Më tej do të shihet rezultati, nëse do të ketë më nevojë për shtrëngim masash.
Në të gjithë Gjermaninë do të mbyllen deri në fund të nëntorit objektet e kulturës dhe aktiviteteve në kohë të lirë. Kafenetë dhe restorantet do të punojnë vetëm për shitjen e mallrave jashtë objekteve. Këto biznese mund të shesin ushqime që mund të merren me vete.
Jo vetëm kaq, por edhe takimet mes familjarëve nuk do jenë më si më parë. Në ambiente të hapura mund të takohen vetëm anëtarët e dy familjeve, e kjo vlen pjesërisht edhe për takime në objekte të mbyllura. Hotelet nuk do të pranojnë turistë. Dyqanet edhe më tej mbeten të hapura, por me kushte shumë më të rrepta se deri tani. Shkollat dhe kopshtet mbeten të hapura.
Masat do të vlejnë deri në fund të nëntorit. Nga mesi i muajit do të bëhet një bilanc i këtyre masave, dhe do të shihet nëse ato kanë dhënë rezultatet e duhura.
