Presidenti Ilir Meta e cilësoi miratimin e paketës “anti-shpifje” me shumicë votash në Kuvend një “kambanë alarmi”.
Gjatë fjalës së tij nga aktiviteti “Liria e shprehjes përballë të drejtave të njeriut”, kreu i shtetit u shpreh se fatkeqësisht liria e medias në vendin tonë është përkeqësuar. Ndërsa shtoi se angazhimi i shtetit dhe shoqërisë në përkrahje të lirisë së medias është tregues i demokracisë.
“Numri i reporterëve që janë larguar është rritur. Disa pronarë e kanë asgjësuar postin e kryeredaktorit të lajmeve e bëjnë vetë. Këto janë kambana alarmi ku ndodhet liria e shprehjes në Shqipëri. Shqiptarët nuk duhet të harrojnë diktaturën dhe vuajtjet nga mohimi i kësaj të drejte. Por kambana më e fortë është shpopullimi”, deklaroi Meta.
Po ashtu, presidenti Meta preku dhe çështjen me azilkërkuesit, teksa theksoi se numri në 10 muajt e parë të këtij viti është rritur me 16% krahasuar me një vit më parë.
“Para një muaji numri i azilkërkuesve për 10 muajt këtij viti është rritur me 16% krahasuar me vitin e kaluar. Në raport me Serbinë për 1 mijë banorë kemi 8.2 herë shifrën më të lartë. Edhe largimi i Agron Tufës ishte lajm tronditës, që u kërcënua për shkak mendimeve. Tronditë ishte edhe mos reagimi i asnjë institucioni”, tha Meta.
