Ish-deputeti i Partisë Demokratike Genc Pollo ka treguar se çfarë ka ndodhur në zonën e “Astirit”, pas aksionit të IKMT-së, ku 33 objekte u shemben, për t’i hapur rrugën realizimit të projektit për “Unazën e Madhe”.
Teksa ishte i ftuar në “News24”, Pollo u shpreh se disa banesa janë shembur me orendi shtëpiake brenda. Pasi banorët nuk ishin përgatitur për ndërhyrjen e IKMT-së.
Në përleshjen e shënuar mes banorëve dhe forcave të policisë, ish-deputeti demokrat theksoi se qytetarët janë rrethuar dhe sulmuar me gaz lotsjellës.
“ Thashë që jo vetëm me ndjenjë njerëzore, por edhe me standard ligjor ata duhet të dëmshpërbleheshin.
Në fakt vetëm bizneset e buzë rrugës, siç përditësuam informacionin sot, rreth 6 biznese buzë rrugës kanë marrë një dëmshpërblim. Pesë familje që kanë pasur certifikatë kanë marrë në dëmshpërblim. Dhe 31 apo 32 u janë shembur banesat me orendi brenda.
Me orendi brenda, sepse ishin aty duke pritur duke mosbesuar se do shembeshin. I shpërndan me gaz lotsjellës në mënyrë të papritur. Qeveritë janë lavdëruar dhe shpeshherë janë sharë dhe kjo është deri diku normale. Një shkallë e tillë arrogance e kombinuar me çnjerëzoren nuk më kujtohet nëse e kam përjetuar nga demokracia e këtej.
