Dy ditë pas protestës së të shtunës, sot në orën 18:30 opozita e bashkuar do të mblidhet në protestën e saj të 5-të kombëtare. Partia Demokratike ka vënë në dijeni policinë, ku thekson se protesta e sotme do të jetë në formë marshimi.
Në letrën që Gazment Bardhi i ka dërguar policisë, u ka bërë thirrje punonjësve të Policisë së Shtetit të mos bëhen pjesë e provokimeve dhe dhunës së paligjshme kundër qytetarëve.
“Policia e Shtetit, në mënyrë të përsëritur, ka kryer akte dhune ndaj qytetarëve në mënyrë kriminale dhe me urdhër politik, për të cilat PD ka kryer kallëzim penal”, thuhet në letrën e Sekretarit të Përgjithshëm të PD, Gazment Bardhi.
Në këtë protestë nuk do të jetë sekretari organizativ i PD, Sahit Dollapi, i cili po merr trajtim intensiv, pasi u dhunua nga policia të shtunën.
