Humbja e Lazios në ndeshjen e fundit në Serie A përballë Interit, që e la edhe jashtë Champions League po i faturohet Thomas Strakoshës. Një pjesë e mediave apo edhe njerëz të famshëm që mbështesin Lazion kanë kryqëzuar Strakoshën për atë top të shkelmuar para dhe që solli atë 11 metërsh. Për t’i dalë në mbrojtje ka menduar gazetari i njohur sportiv italian i rrjetit televiziv RAI, Stefano Bizoto, i cili duke folu për një radio romane, ka shpjeguar se portierit shqiptar nuk i duhej vënë faj.
“Kritikat për Strakoshën më lënë pa fjalë. Ai është 23 vjeç, për një portier janë shumë pak dhe fenomen në moshën 18 vjeçare ne kemi pasur vetëm një në 30 vitet e fundit, quhet Gigi Buffon.
Gabimet mund të ndodhin, për një portier mbeten më shumë në mendje por duhet të merret në tërësi në vlerësim situata. Këtë vit, Sirigu ka qenë një ndër më të mirët sa i përket vazhdimësisë, por në grupin e më të mirëve është edhe Strakosha dhe t’i hedhim atij fajin është e tepruar. Ai është një element të cilin duhet ta mbajmë të shtrënguar pas vetes”, ishin fjalët e gazetarit italian.
