Kryetari i Komisionit Zgjedhor në Partinë Demorkatike, Jemin Gjana ka sqaruar procedurat në lidhje me zgjedhjet e 13 qershorit, që do të përcaktojnë kryetarin e ri të kësaj force politike.
Gjana deklaroi se nëse një anëtar i partisë paraqitet ditën e votimit me një dokument anëtarësie dhe nuk e ka emrin në listë, do t’i bëhet një fotokopje kartës së identitetit dhe do të votojë me kartën e anëtarësisë, duke u futur me një listë shtesë.
Deklarata e Gjanajt, u bë ditën e sotme në emisionin ”Kjo Javë” në News 24. Ndër të tjera, Gjana bëri me dije se pjesëmarrja në zgjedhje nuk është kusht, dhe se fituesi do të shpallet me 50 %+1 të votave të vlefshme..
Sipas tij, rezultatet e para të votimeve do të fillojnë nga mesnata, teksa shtoi se numërimi i votave do të kryhet në 76 komisione.
Jemin Gjana: ‘‘Nëse një anëtar do të paraqitet me një dokument anëtarësie, pavarësisht se nuk e ka emrin në listë, do të paraqitet duke patur edhe kartën e identitetit, do të dorëzojë një fotokopje të kartës së identitetit, do të votojë me këtë kartë anëtarësia, do të futet me një listë shtesë. Pra, do të votojë. Për Tiranën do ta kemi pak më të kontrolluar procesin, sepse degët e Tiranës, janë shumë pranë njëra tjetrës. Brenda një dege në Tiranë, qoftë edhe për ilaritet mund të votojë dy herë, se një që është në Kukës, nuk shkon të votojë edhe në Kukës edhe në Dibër. Ndaj do kërkojmë këtë kopje të kartë së identitetit.
Pjesëmarrja nuk është kusht, fituesi shpallet me 50 %+1 të votave të vlefshme. Numërimin do ta bëjmë në 76 komisione që janë krijuar, besoj rezultatet e para do të fillojnë të dalin nga mesnata, por do të jenë rezultate të marra në mënyrë telefonike, jo rezultati përfundimtar. Për rezultatin përfundimtar do të presim procesverbalet në të gjitha degët e PD-së. Do të jetë numërim publik, në tavolinë do të jenë tre anëtarët e komisionit që janë përcaktuar nga kryesitë e degëve dhe 4 përfaqësuesit e kandidatëv, me qëllim që procesi të jetë i besueshëm. Pati shumë kandidatura këtë dhe u përcaktuan 4. Pati një diskutim shumë të gjatë në kryesinë e PD dhe u gjykua të shkohet me 4 kandidatë si asnjëherë tjetër në historikun e PD, e madje në dijeninë time edhe të ndonjë partie tjetër në Shqipëri.”
